Мектебімізде кәмелетке толмағандар арасындағы құқық бұзушылықтың, буллинг пен кибербуллингтің алдын алу мақсатында профилактикалық іс-шаралар өткізілді.
Іс-шараның негізгі мақсаты — оқушылардың құқықтық сауаттылығын арттыру, өз құқықтары мен міндеттерін түсіндіру, жеке қауіпсіздік ережелерін сақтау және өз іс-әрекеттеріне жауапкершілікпен қарау дағдыларын қалыптастыру.
Оқушылармен кездесу барысында учаскелік полиция қызметкері Е.А.Ашимханов профилактикалық әңгімелер жүргізіп, қауіпсіз мінез-құлық ережелері, қолданыстағы заңнама нормалары және құқық бұзушылық жасағаны үшін көзделген жауапкершілік шаралары туралы түсіндірді.
Сонымен қатар буллинг пен кибербуллингтің түрлері, олардың зардаптары және алдын алу жолдары талқыланды. Оқушыларға бір-бірін құрметтеу, өзара сыйластық таныту, өзгелерді кемсітпеу және қорлау жағдайларына бейжай қарамау қажеттігі түсіндірілді.
Балалардың күнделікті өмірдегі қауіпсіздігіне де ерекше назар аударылды. Оқушыларға қоғамдық орындарда, жолда, мектепте және интернет желісінде қауіпсіздік ережелерін сақтау, бейтаныс адамдармен қарым-қатынас жасауда сақ болу және құқыққа қайшы әрекеттерге тартылудың алдын алу жолдары түсіндірілді.
Осындай профилактикалық іс-шаралар оқушылардың құқықтық мәдениетін арттыруға, буллинг пен құқық бұзушылықтың алдын алуға, өзара құрмет пен жауапкершілікті қалыптастыруға және мектепте қауіпсіз білім беру ортасын қамтамасыз етуге бағытталған.